Num 25 | CopSahBible2 | STEP | ⲁⲩⲱ ⲁⲡ ⲓ︤ⲏ︦ⲗ︥ ⲟⲩⲱϩ ϩⲣⲁⲓ ϩⲛ ⲥⲁⲇⲧⲓⲛ ⲁⲡⲗⲁⲟⲥ ϫⲱϩⲙ ⲉⲡⲟⲣⲛⲉⲩⲉ ⲙⲛ ⲛϣⲉⲉⲣⲉ ⲙⲙⲱⲁⲃ

Numbers 25

1 ⲁⲩⲱ ⲁⲡⲓ︤ⲏ︦ⲗ︥ ⲟⲩⲱϩ ϩⲣⲁⲓ ϩⲛ ⲥⲁⲇⲧⲓⲛ ⲁⲡⲗⲁⲟⲥ ϫⲱϩⲙ ⲉⲡⲟⲣⲛⲉⲩⲉ ⲙⲛ ⲛϣⲉⲉⲣⲉ ⲙⲙⲱⲁⲃ 2 ⲁⲩⲱ ⲁⲩⲧⲁϩⲙⲟⲩ ⲉϩⲣⲁⲓ ⲉϫⲛ ⲛⲉⲑⲩⲥⲓⲁ ⲛⲛⲉⲩⲉⲓⲇⲱⲗⲟⲛ ⲁⲡⲗⲁⲟⲥ ⲟⲩⲱⲙ ⲉⲃⲟⲗ ϩⲛ ⲛⲉⲩⲑⲩⲥⲓⲁ ⲁⲩⲱ ⲁϥⲟⲩⲱϣⲧ ⲛⲛⲉⲩⲉⲓⲇⲱⲗⲟⲛ 3 ⲁⲡⲓ︤ⲏ︦ⲗ︥ ϣⲙϣⲉ ⲛⲃⲉⲉⲗⲫⲉⲅⲱⲣ ⲡϫⲟⲉⲓⲥ ⲇⲉ ⲁϥϭⲱⲛⲧ ϩⲛ ⲟⲩϭⲱⲛⲧ ⲉϩⲣⲁⲓ ⲉϫⲙ ⲡⲓ︤ⲏ︦ⲗ︥ 4 ⲁⲩⲱ ⲡⲉϫⲉⲡϫⲟⲉⲓⲥ ⲙⲙⲱⲩⲥⲏⲥ ϫⲉ ϫⲓ ⲛⲁⲣⲭⲏⲅⲟⲥ ⲛⲓⲙ ⲛⲧⲉ ⲡⲗⲁⲟⲥ ⲛⲅⲡⲁⲣⲁⲇⲓⲅⲙⲁⲧⲓⲍⲉ ⲙⲙⲟⲟⲩ ⲙⲡϫⲟⲉⲓⲥ ⲙⲡⲉⲙⲧⲟ ⲉⲃⲟⲗ ⲙⲡⲣⲏ 5 ⲁⲩⲱ ⲧⲟⲣⲅⲏ ⲙⲡϭⲱⲛⲧ ⲛⲁⲕⲧⲟⲥ ⲉⲃⲟⲗ ⲙⲡⲓ︤ⲏ︦ⲗ︥ ⲁⲩⲱ ⲡⲉϫⲉⲙⲱⲩⲥⲏⲥ ⲛⲛⲉⲫⲩⲗⲟⲟⲩⲉ ⲙⲡⲓ︤ⲏ︦ⲗ︥ ϫⲉ ⲙⲁⲣⲉⲡⲟⲩⲁ ⲡⲟⲩⲁ ⲙⲟⲩⲟⲩⲧ ⲙⲡⲉϥⲣⲙⲉⲛⲏⲓ ⲡⲉⲛⲧⲁϥϣⲙϣⲉ ⲛⲃⲉⲉⲗⲫⲉⲅⲟⲣ 6 ⲁⲩⲱ ⲉⲓⲥ ⲟⲩⲣⲱⲙⲉ ⲉⲃⲟⲗ ϩⲛ ⲛϣⲏⲣⲉ ⲙⲡⲓ︤ⲏ︦ⲗ︥ ⲁϥⲉⲓ ⲁϥⲉⲙⲡⲉϥⲥⲟⲛ ⲙⲛ ⲟⲩⲥϩⲓⲙⲉ ⲉⲃⲟⲗ ϩⲙ ⲙⲁⲇⲓϩⲁⲙ ⲙⲡⲉⲙⲧⲟ ⲉⲃⲟⲗ ⲙⲙⲱⲩⲥⲏⲥ ⲁⲩⲱ ⲙⲡϩⲟⲧ ⲉⲃⲟⲗ ⲛⲧⲥⲩⲛⲁⲅⲱⲅⲏ ⲧⲏⲣⲥ ⲛⲛϣⲏⲣⲉ ⲙⲡⲓ︤ⲏ︦ⲗ︥ ⲛⲧⲟⲟⲩ ⲇⲉ ⲛⲉⲩⲣⲓⲙⲉ ⲡⲉ ϩⲁⲧⲙ ⲡⲣⲟ ⲛⲧⲉⲥⲕⲩⲛⲉ ⲙⲡⲙⲛⲧⲣⲉ 7 ⲁⲩⲱ ⲛⲧⲉⲣⲉϥⲛⲁⲩ ⲛϭⲓ ⲫⲉⲓⲛⲉⲉⲥ ⲡϣⲏⲣⲉ ⲛⲉⲗⲉⲁⲍⲁⲣ ⲡϣⲏⲣⲉ ⲛⲁⲁⲣⲱⲛ ⲡⲟⲩⲏⲏⲃ ⲁϥⲧⲱⲟⲩⲛ ⲉⲃⲟⲗ ϩⲛ ⲧⲙⲏⲧⲉ ⲛⲧⲥⲩⲛⲁⲅⲱⲅⲏ ⲁϥϫⲓ ⲛⲟⲩⲥⲓⲣⲱⲙⲁⲥⲧⲏⲥ ϩⲣⲁⲓ ϩⲛ ⲧⲉϥϭⲓϫ 8 ⲁϥⲃⲱⲕ ⲉϩⲟⲩⲛ ⲉⲧⲉϩⲣⲱ ϩⲓ ⲡⲁϩⲟⲩ ⲙⲡⲣⲱⲙⲉ ⲡⲓⲥⲣⲁⲏⲗⲓⲧⲏⲥ ⲁϥⲕⲟⲛⲥⲟⲩ ⲙⲡⲉⲥⲛⲁⲩ ⲡⲣⲱⲙⲉ ⲡⲓⲥⲣⲁⲏⲗⲓⲧⲏⲥ ⲙⲛ ⲧⲉⲥϩⲓⲙⲉ ⲉⲃⲟⲗ ϩⲓⲧⲛ ⲧⲉⲥⲟⲟⲧⲉ ⲁⲩⲱ ⲁⲧⲟⲣⲅⲏ ⲗⲟ ϩⲛ ⲛϣⲏⲣⲉ ⲙⲡⲓ︤ⲏ︦ⲗ︥ 9 ⲛⲉⲛⲧⲁⲩⲙⲟⲩ ⲇⲉ ϩⲣⲁⲓ ϩⲛ ⲧⲉⲡⲗⲩⲅⲏ ⲁⲩⲣϫⲟⲩⲧⲁϥⲧⲉ ⲛϣⲟ 10 ⲁⲩⲱ ⲡϫⲟⲉⲓⲥ ⲁϥϣⲁϫⲉ ⲙⲛ ⲙⲱⲩⲥⲏⲥ ⲉϥϫⲱ ⲙⲙⲟⲥ 11 ϫⲉ ⲫⲓⲛⲉⲉⲥ ⲡϣⲏⲣⲉ ⲛⲉⲗⲉⲁⲍⲁⲣ ⲡϣⲏⲣⲉ ⲛⲁⲁⲣⲱⲛ ⲡⲟⲩⲏⲏⲃ ⲡⲉⲛⲧⲁϥϯϩⲣⲟⲕ ⲙⲡⲁϭⲱⲛⲧ ϩⲛ ⲛϣⲏⲣⲉ ⲙⲡⲓ︤ⲏ︦ⲗ︥ ϩⲙ ⲡⲧⲣⲉⲩⲕⲱϩ ⲉⲡⲁⲕⲱϩ ϩⲣⲁⲓ ⲛϩⲏⲧⲟⲩ ⲁⲩⲱ ⲙⲡⲓⲃⲱⲧⲉ ⲉⲃⲟⲗ ⲉⲛⲉⲛϣⲏⲣⲉ ⲙⲡⲓ︤ⲏ︦ⲗ︥ ϩⲙ ⲡⲁⲕⲱϩ 12 ⲁϫⲓⲥ ⲛⲁϥ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ϯⲛⲁϯ ⲛⲁϥ ⲛⲛⲟⲩⲇⲓⲁⲑⲏⲕⲏ ⲛⲉⲓⲣⲏⲛⲏ 13 ⲛⲥϣⲱⲡⲉ ⲛⲁϥ ⲙⲛ ⲡⲉϥⲥⲡⲉⲣⲙⲁ ⲙⲛⲛⲥⲱϥ ⲟⲩⲇⲓⲁⲑⲏⲕⲏ ⲙⲙⲛⲧⲟⲩⲏⲏⲃ ϣⲁ ⲉⲛⲉϩ ⲉⲧⲃⲉ ϫⲉ ⲁϥⲕⲱⲕ ⲉⲡⲉϥⲛⲟⲩⲧⲉ ⲁⲩⲱ ⲁϥⲥⲟⲡⲥ ϩⲁ ⲛϣⲏⲣⲉ ⲙⲡⲓ︤ⲏ︦ⲗ︥ 14 ⲡⲣⲁⲛ ⲇⲉ ⲙⲡⲣⲱⲙⲉ ⲛⲓⲥⲣⲁⲏⲗⲓⲧⲏⲥ ⲡⲉⲛⲧⲁϥⲕⲱⲛⲥ ⲙⲙⲟϥ ⲙⲛ ⲧⲉⲥϩⲓⲙⲉ ⲧⲉ ⲉⲃⲟⲗ ϩⲛ ⲙⲁⲇⲓϩⲁⲙ ⲡⲉ ⲥⲁⲙⲃⲣⲓ ⲡϣⲏⲣⲉ ⲛⲥⲁⲗⲱⲙ ⲡⲁⲣⲭⲱⲛ ⲙⲡⲏⲓ ⲛⲧⲡⲁⲧⲣⲓⲁ ⲛⲥⲩⲙⲉⲱⲛ 15 ⲁⲩⲱ ⲡⲣⲁⲛ ⲛⲧⲉⲥϩⲓⲙⲉ ⲧⲉ ⲉⲃⲟⲗ ϩⲛ ⲙⲁⲇⲓϩⲁⲙ ⲧⲉⲛⲧⲁϥⲕⲟⲟⲛⲥ ⲧⲉ ⲭⲁⲥⲃⲓ ⲧϣⲉⲉⲣⲉ ⲛⲥⲟⲩⲣ ⲡⲁⲣⲭⲱⲛ ⲙⲡϩⲉⲑⲛⲟⲥ ⲛⲟⲙⲙⲱⲑ ⲡⲏⲓ ⲛⲧⲡⲁⲧⲣⲓⲁ ⲛⲧⲉ ⲙⲁⲇⲓϩⲁⲙ 16 ⲁⲩⲱ ⲡϫⲟⲉⲓⲥ ⲁϥϣⲁϫⲉ ⲙⲛ ⲙⲱⲩⲥⲏⲥ ⲉϥϫⲱ ⲙⲙⲟⲥ ϫⲉ ϣⲁϫⲉ ⲙⲛ ⲛϣⲏⲣⲉ ⲙⲡⲓ︤ⲏ︦ⲗ︥ ⲉⲕϫⲱ ⲙⲙⲟⲥ 17 ϫⲉ ⲁⲣⲓϫⲁϫⲉ ⲙⲙⲁⲛⲇⲓⲛⲛⲁⲓⲟⲥ ⲛⲧⲉⲧⲛⲡⲁⲧⲁⲥⲥⲉ ⲙⲙⲟⲟⲩ 18 ϫⲉ ⲛⲧⲟⲟⲩ ⲥⲉⲟ ⲛϫⲁϫⲉ ⲉⲣⲱⲧⲛ ϩⲛ ⲟⲩⲕⲣⲟϥ ⲁⲩⲱ ⲥⲉⲣⲕⲣⲟϥ ⲉⲣⲱⲧⲛ ⲉⲧⲃⲉ ⲫⲟⲅⲱⲣ ⲙⲛ ⲭⲁⲥⲃⲓ ⲧϣⲉⲉⲣⲉ ⲙⲡⲁⲣⲭⲱⲛ ⲙⲙⲁⲇⲓϩⲁⲙ ⲧⲉⲩⲥⲱⲛⲉ ⲧⲉⲛⲧⲁⲩⲕⲟⲟⲛⲥ ϩⲙ ⲡⲉϩⲟⲟⲩ ⲛⲧⲉ ⲡⲗⲏⲅⲏ ⲉⲧⲃⲉ ⲫⲟⲅⲱⲣ